Pasian in mihing koimakibang chiet in asiamsih a, khovel mi hijalai a koima bukim tah a kibang umlou ahi. Chituom chiet asiam bang in Khenkhat amel-le-puom in kisunnan leh jong ahindan leh kammal jah dan chituom chietthou veve hi.
Mijousieh kibang lou chi nuom na tah chu… eimite’n mikhat asiet a, khamthei guithei ang neh chieng in, alawm-leh-guol kivotpite, insungmite, a umna-tengna jousia etdan tuom in enngal chibang I khotang hikhuoh ua chiin ding a hoi loutah ahi.
Adieh in tulai gamtuom a um, sepna sui-lekhasim a um nungah leh tangvalte tung apat in neukhat ilungsim uh ahoilam in koisawm lei la? Innlam jong jatheilou, zu-leh-sa a kimawl khanglai khat gamtuom a potchieng in jong innlam hindan bang in munjousia a um veve hi. Manipur gam sung a umlou, khopi tuomtuom, Delhi, Mumbai, Shillong, Bengalore etc etc ichite a um numeite hi Numei khat thangtat jieh in numei jousieh bang in imu-ikoi uoi?
Tangpi in ilungsim ua um ding chu akibang chiet ah ikoi ding uh ka gingta hi. Ahin tuami lunggel inei kha jenjen uh leh adih lou ahi. Mikhat siet jieh in mijou jong asia’n gel sin, hindan kibanglou, tawndan kibang lou, lunggel chituomtuom ngennei ihi ua, gamtuom a um ita-leh-nau, sanggamte jousie ajieh (purpose) tuomtuom nei a um ahia, khenkhat innsung hasatjieh in apianpi(pasalte) khankho ding, alaisim nang lunggel nei jieh a gim-leh-tawl khosah lou a company a sem tampi eimi a um hi, thei lou nama?
Ei-leh-ei kitahsang vang, itanu-itapate uh I innsung ua hoitah a namuang ngam a, gamtuom a nasol leh bang ding a mite thugen mit a mulou, khat-leh-ni siet jieh a mijusia ahilou dia ikoithei nalai ding uh eh? Kisuh lungkham sin, gamtuom a um innsung a mihoi tah leh namuong ngam jieh a gamtuom a nasawl ahia, igensa mabang in mikhat hoilou nate jieh’n itanu-itapa uh huchi ding chi lunggel nei in kisu lungkham non sihvai!
19th Nov. 2013