Hasatna leh buaina kawmkal a, huipi/guapi ki nongjong leh, sianmang laitansa, jeidei oi’a lamtuol kaithei aumthei khu ei leh ei ikitahsangna uh etsahna ahia tua ban a isah ihangte ding ajong lemna leh muonna umjing ahi chi proof na khat jong ahi. Ei leh ei in tahsangna leh thudih agamta theiding lungtang ineina pou leh khovel buaitawp in hoisih nanleh lemna kichi ijoou jing uh ahi chithei vai.
Mihing khat ama leh ama kitahsangna angneilou chiang in bitlouna(insecure), a umna munteng ah jong lungmuanna leh lemna a siamthei sih a, jong kipahna atamnei jou sih hi. Sana leh dangka in aleitheilou, mipil/misiamte jong aboltheilou, Khovel a mihampha penpente khu koima dang a ahituan sih a,”...eite bang a genthei hasatna kawmkal a thudih tah leh ginna liantah nei a, lungmuanna leh atantawh a lungkim a, ahun leh amun dungjui a khosahtheite khu ana h jel hii..”
Kitahsangna in hatna’n mi atun a, isilbawl taphot a ginna leh muanna neite ding in alampi ang umthei giap ding ahi. Silsia lam kilam etsang in ahoijo lamding kilam ettheilei phattuamna tampi ang umthei giap ding hi. Ei lungkham, lunggim leh buainate jieh in isah/ihang/ ilawm leh guolte kung a tungding in lunggel nei dalei ahoi jo ding.
Atangpi’n eite lah ah kimuangngamna itasam deu ua, tuachin thawmhau sasan ihinkhuoh uh imang uhi. Singtangmi chin ikimin vo lillel ua, tawndan(culture) leh pawi(festival) chite vel jong mite sang in ihau ua kumkhat sung in jong hunthupi tamtah mangthei dinga umhi. Ipu leh pate tawndan mangsah ding ijau uah, ikineisah ua, mite hing simmawh dingpen inuomtuon sih uh, hinan leh hunbangtan eh napeisa apat athu(words) meimei leh ikamchou un ihina uh ngainatna liantah inei ua thudih a dingngamlou jai’n bangtan eh khat imangsuoh phial uh ahi.
Kum leh kum kilu tuoh a itawndan uh pawi umte thupi tah a mangthei leh uopthei ding in koima dang a umsih a ei mama ihi uhi. Ihina (identity) iit ihi uh leh nang leh kei mama in itawisang ding atul mawh hi , Ivengsung leh namsung a siamjilte chou in inam atawi mawithei ahi tuansih a, aneu apat liantan in silhoi bawl a ingainat khawm chiang in inam ngaina kahi chi thei giap ding ihi uhi.
Ei leh ei kitahsang jia’n koi man ang khupkhel thei sih ding a, lungkham/meipi jing nuai a, ihi na bang a lungkimthei a, Sian ah ginna tah inei uoh, itawndan leh ihi na uh jumpi lou a, alam hunchiang a lam a, neh ding chiang a nekhawmthei a, sepding chiang a semjel a ahinkhuoh uh kitoudel thei a um liai liai a, eima mimal sung leh vengsung a kipahna leh lemna ang um khu bangma dang ahisih a “IKITAH SANG JIEH UH AHI”